У судзе Партызанскага раёна Мінска разгледзелі справу расіянкі, якая, едучы праз Нацыянальны аэрапорт Мінск, не задэкларавала буйную суму наяўных грошай. У выніку жанчына не толькі заплаціла штраф, але і страціла значную частку сродкаў. Пра гэтую гісторыю «Люстэрка» даведалася з банка судовых рашэнняў.
Памылка на мытні
Жанчына прыляцела ў Мінск авіярэйсам з Грузіі, разам з мужам і двума малагадовымі дзецьмі. Яны ішлі праз зялёны калідор, аднак мелі пры сабе суму, якая перавышае ліміт для абавязковага дэкларавання: 31 608 даляраў, 10 000 еўра, 657,55 турэцкай ліры і 1201 расійскі рубель.
Перад паездкай муж і жонка размеркавалі грошы паміж сабой і дзецьмі, расклаўшы іх у чатыры асобныя пачкі, кожны з якіх змяшчаў суму, эквівалентную 10 000 даляраў ЗША. Жанчына несла іх у сваёй торбе, думаючы, што, раз грошы належаць усёй сям'і, іх дэклараванне не патрабуецца.
Аднак супрацоўнікі мытні, западозрыўшы парушэнне, спынілі жанчыну і правялі дагляд. У яе торбе былі знойдзеныя тры пачкі па 10 000 даляраў, адзін пачак з 10 000 еўра, а таксама дадатковыя сумы ў кашальку — 1608 даляраў, турэцкія ліры і расійскія рублі.
Аргументы бакоў
На судзе жанчына прызнала віну і растлумачыла, што не лічыла, што грошы падлягаюць дэклараванню. Жанчына сцвярджала, што ведала пра ліміт 10 000 даляраў на чалавека, але лічыла, што правіла распаўсюджваецца толькі на сумы ў еўра. Таксама яна заявіла, што проста не задумвалася пра тое, што, як адзіны чалавек, у якога пры сабе ўся сума, яна парушае мытныя правілы.
Муж пацвердзіў яе версію, заявіўшы, што яны не збіраліся хаваць грошы. Аднак мытнікі зафіксавалі, што падчас першаснага апытання жанчына адмаўляла наяўнасць дадатковых сумаў і толькі пасля пачатку дагляду прызнала, што яны ёсць. Відэазапісы з мытнага паста таксама паказалі, што пасля перасячэння лініі ўваходу ў зялёны калідор жанчына не рабіла спробаў самастойна заявіць пра наяўнасць буйных сумаў.
Рашэнне суда
На падставе відэазапісаў і паказанняў сведак суд прызнаў расіянку вінаватай у адміністрацыйным правапарушэнні па ч. 2 арт.15.5 (Недэклараванне грашовых сродкаў) КаАП Беларусі. Суд улічыў чыстасардэчнае раскаянне, наяўнасць на ўтрыманні малагадовых дзяцей і адсутнасць раней учыненых правапарушэнняў, але адзначыў, што парушэнне нельга прызнаць малазначным.
У выніку ёй прызначылі штраф сумай 10 базавых адзінак (цяпер 420 рублёў) і канфіскавалі незадэклараваныя грошы: 21 608 даляраў, 10 000 еўра, 657,55 турэцкай ліры і 1201 расійскі рубель. Аднак сума 10 000 даляраў, якая не ёсць прадметам парушэння, падлягае вяртанню.
З Беларусі і ў Беларусь без дэкларавання адзін чалавек можа правезці не больш за дзесяць тысяч даляраў у эквіваленце. Дакладная сума разлічваецца паводле курсу валют на дзень паездкі. Улічваць будуць усе грошы, якія ў вас з сабой. То-бок перавезці, да прыкладу, дзесяць тысяч даляраў у валізе і яшчэ 500 у кашальку без дэкларацыі не атрымаецца. Калі вы захочаце завезці ці вывезці больш за дзесяць тысяч даляраў у эквіваленце, гэтую суму давядзецца дэклараваць.
