«Беларусь — прыклад таго, як у высокаразвітай еўрапейскай краіне могуць быць парушаныя дэмакратычныя правілы і ў выніку ўсталяваная дыктатура, якая не дазваляе развівацца апазіцыйнаму дэмакратычнаму руху», — заявіў прэм’ер-міністр Балгарыі Мікалай Дзенкаў 5 сакавіка на сустрэчы з беларускім дэмакратычным лідарам Святланай Ціханоўскай, паведамляе «Позірк».
«Калі ў вас ёсць меркаванне, адрознае ад меркавання ўрада, выбар такі: альбо сесці ў турму, альбо пакінуць краіну», — цытуе балгарскага прэм’ера агенцтва Dariknews.
На яго думку, «няма ніводнай краіны, якая была б застрахаваная ад такога развіцця падзей», «адзінай страхоўкай» ад гэтага з’яўляецца «захаванне дэмакратычных правілаў, адсутнасць людзей з неабмежаванай уладай, абмежаванне паўнамоцтваў прэзідэнтаў».
«Гісторыя паказвае, што спакуса перайсці да дыктатарскага рэжыму надзвычай вялікая», — падкрэсліў Дзенкаў.
Ціханоўская заявіла, што «праціўнікі ўлады ў Беларусі» рызыкуюць быць «затрыманымі на гады».
«Мы паказалі, што мы на баку ўкраінцаў, таму што яны клапоцяцца не толькі пра сваю краіну, мы ўзаемазвязаныя, — дадала палітык. — У такіх умовах у Беларусі не можа быць міру і бяспекі. Мы заклікаем Балгарыю падтрымаць украінцаў. Мы сутыкаемся з акупацыяй. Ва Украіне мы змагаемся з расійскімі ракетамі, а ў Беларусі — з прыгнётам нашых інстытутаў».
Паводле слоў Ціханоўскай, Расія «спрабуе знішчыць наш народ». Яна заклікала «балгарскі ўрад і народ» падтрымаць Беларусь «у барацьбе з расійскімі амбіцыямі».
«Беларускі рэжым звязаны з Пуціным. Пакуль беларусы падтрымліваюць украінцаў, мы не самотныя ў нашай барацьбе», — сказала дэмлідар.
Адзначаецца, што на сустрэчы таксама прысутнічала намесніца прэм’ер-міністра Балгарыі — міністр замежных спраў Марыя Габрыэль, якая «рашуча асудзіла саўдзел Беларусі ў зверствах Расіі».
«Мы асуджаем ролю Мінска як памагатага Расіі. Мы павінны быць пільныя ў дачыненні да ўхілення ад санкцый. Мы падтрымліваем еўрапейскія памкненні беларускага народа. Балгарыя выразна і паслядоўна падтрымлівае гэтыя намаганні», — заявіла кіраўніца МЗС.
Балгарскі партал offnews паведаміў аб праведзенай 5 сакавіка сустрэчы Ціханоўскай з былым прэм’ер-міністрам Балгарыі, лідарам партыі ГЕРБ Бойка Барысавым, які сярод іншага заявіў, што Сафія «катэгарычна падтрымлівае ўсе законныя імкненні беларускага народа пабудаваць дэмакратычную дзяржаву, заснаваную на вяршэнстве закона і асноўных правах чалавека, абраць сваіх прадстаўнікоў шляхам рэальных, дэмакратычных і празрыстых выбараў».
Балгарыя, паводле яго слоў, «будзе прадаўжаць падтрымліваць усе ініцыятывы ЕС, накіраваныя на падтрымку беларускай грамадзянскай супольнасці». «Пачатак дэмакратычнага пераходу ў Беларусі, стабілізацыя эканомікі краіны і рэфармаванне яе інстытутаў — гэта працэсы, якія Еўрасаюз будзе паслядоўна падтрымліваць у інтарэсах беларускіх грамадзян і дэмакратычнай, квітнеючай і мірнай Еўропы», — сказаў Барысаў.
Ён таксама заявіў, што ў балгарскім парламенце будзе створаная група «сяброў дэмакратычнай Беларусі».
Візіт Святланы Ціханоўскай у Балгарыю праходзіць 4−6 сакавіка. Гэта яе першы афіцыйны візіт у гэтую краіну. З Дзенкавым яна сустракалася ў жніўні 2023 года.