Чыноўнікі вырашаюць, якія аўтамабілі трапяць пад павышаны падатак. Нагадаем, у 2024 годзе ўлады вырашылі з некаторых машын спаганяць транспартны збор у дзесяціразовым памеры.
Спіс аўто, якія падпадуць пад павышаны транспартны падатак, пакуль не апублікаваны, яго падрыхтоўкай цяпер займаюцца чыноўнікі. Раней у МПЗ паведамлялі, што павышаны падатак могуць увесці на мадэлі аўтамабіляў марак Bentley, Rolls-Royce, Lexus, Porsche, Mercedes, Audi, BMW, Cadillac, Jeep, Land Rover і Jaguar.
Аднак пад павышаны транспартны падатак могуць падпадаць і іншыя маркі машын. Пра гэта ў аўторак, 30 студзеня, у анлайн-эфіры Нацыянальнага цэнтра прававой інфармацыі паведаміў начальнік галоўнага ўпраўлення падаткаабкладання фізічных асоб МПЗ Андрэй Кавалеўскі.
Так, у прадстаўніка МПЗ спыталі, ці падпадуць пад павышаны транспартны падатак дарагія мадэлі аўтамабіляў Geely, Volkswagen, Lada, Audi.
Андрэй Кавалеўскі ўдакладніў, што спіс аўтамабіляў, для якіх увядуць павышаны збор, цяпер фармуецца.
«Павышаны падатак трэба будзе выплачваць у наступным годзе. Праца над спісам вядзецца. Lada і Geely не разглядаліся для ўключэння ў яго, — удакладніў Андрэй Кавалеўскі. — Па Audi і Volkswagen праца ідзе, бо аналізуюцца звесткі органаў унутраных справаў пра кошт новых аўтамабіляў дадзеных марак — не ўсіх, а пэўных мадэляў гэтых марак. Аналізуюцца звесткі пра ўвоз транспартных сродкаў. Апрацоўваецца вялікі пласт інфармацыі, вызначаюцца сярэднія цэны новых транспартных сродкаў розных марак. І ўжо з улікам гэтага будзе падрыхтаваная пастанова (урада са спісам аўто, якія падпадуць пад павышаны транспартны збор. — Заўв. рэд.).
Як удакладніў Андрэй Кавалеўскі, плануецца, што спіс аўто будзе падрыхтаваны ў першым квартале гэтага года.
Нагадаем, стандартныя стаўкі транспартнага падатку таксама павысілі ў 2024 годзе. Сума транспартнага падатку залежыць ад дазволенай максімальнай масы, ёмістасці або прапісаная за адну адзінку транспартнага сродку. Да прыкладу, за аўтамабіль з дазволенай максімальнай масай да 1,5 тоны цяпер трэба плаціць 61 рубель за год, а павысяць да 66 рублёў. Па павышанай у дзесяціразовым памеры стаўцы выйдзе 660 рублёў, калі ўвядуць змены.
Чытайце таксама
