Праз падзенне збітага беспілотніка, які ў ноч на 5 верасня заляцеў у Беларусь, у Гомелі адбыўся пажар у будынку склада, паведамілі ў МНС.
«У выніку падзення, як мяркуецца, збітага беспілотнага лётнага апарата адбылося загаранне цаглянага будынка склада ў Гомелі на 8-м зав. Ільіча», — расказалі ў ведамстве.
Падраздзяленні МНС ліквідавалі пажар, ніхто не пацярпеў. Агонь пашкодзіў 5 квадратных метраў даху.
Паводле звестак «Флагштока», склад знаходзіцца на тэрыторыі ліквідаванага прадпрыемства «Мебельная фабрика К.В.П.». Як паведамляе канал, другое месца падзення абломкаў беспілотніка — вуліца 3-я Тэхнічная, забудаваная сядзібнымі дамамі.
Нагадаем, маніторынгавы праект «Беларускі Гаюн» паведаміў, што ў ноч на 5 верасня некалькі расійскіх дронаў «Шахед» заляцелі ў Беларусь з Чарнігаўскай вобласці Украіны. У Баранавічах у неба паднялі знішчальнікі, у Гомельскім раёне былі чуваць выбухі. Як мінімум адзін збіты беспілотнік упаў у Гомелі. Праз разбураныя абломкі ў адным з раёнаў горада ўзніклі пажары, іх патушылі.
У Мінабароны Беларусі пацвердзілі начны прылёт беспілотнікаў і паведамілі, што ўсе цэлі знішчыла СПА. Там не ўдакладнілі, з якой краіны заляцелі дроны і чыёй яны вытворчасці.
Па факце парушэння дзяржмяжы ў паветранай прасторы праводзіцца праверка.